|
傲慢佮偏見 / |
作者 珍．阿斯頓 Jane Austen，1775-1817 一位真有代表性的英國女性作家。伊出世佇庄跤的牧師家庭，雖然無受過完整的正規教育，但是自細漢就誠愛閱讀寫作，經由自學佮厝內的知識教養，伊十外歲開始創作，就此顯露筆花佮文采。珍．阿斯頓的作品，大部分是以家己佇英國庄跤出身、生活的中產階級日常做背景。19世紀英國社會的人情世態、風俗習慣、婚姻戀愛，攏是伊主要的創作題材。透過自然活跳、趣味詼諧的語言，靈活機巧的好禮雅氣、話帶心機，雕琢人物的個性佮精神，呈現英國文化佮社會的面貌佮底蒂。珍．阿斯頓有六部重要的長篇小說傳世，其中的《傲慢佮偏見》（Pride and Prejudice）是伊上蓋流行、上有影響力的作品。出版了後，毋但有濟濟讀者佮意愛讀，閣經過電影、電視劇的改編佮各種延伸改寫，對後世作品有誠重要的啟發，成做當代浪漫小說的原型經典。