英國庄跤有一位班奈太太，伊透世人的願望，就是欲將五个查某囝全嫁出去。有一日，一位貴公子賓利按算佇班家附近稅厝做厝邊，班奈太太就想空想縫，步數盡展，欲來將查某囝佮伊捒做堆。舞會的時，班家的大漢查某囝珍佮賓利一見鍾情，但是第二查某囝伊俐莎白，煞因為一時的態度佮誤會，對賓利的好朋友達西無好印象。後來更加因為各種事件佮使弄，予伊俐莎白對達西有濟濟偏見。兩人原是門不當、戶不對，無話無句不投機，那知達西是一下煞著，雙方膏膏纏，結果冤家冤甲行鬥陣。一个是好額緣投、驕傲苛頭的貴公子，一位是聰明伶俐、厚思量的二小姐，𪜶的愛情，是按怎佇傲慢下底的真實面腔佮偏見背後的真相觸纏之間，沓沓仔變化發穎？一場險險仔相閃身的青春戀情，閣加一味台語，心適媠氣、氣口飽滇！

作者 珍．阿斯頓 Jane Austen，1775-1817 一位真有代表性的英國女性作家。伊出世佇庄跤的牧師家庭，雖然無受過完整的正規教育，但是自細漢就誠愛閱讀寫作，經由自學佮厝內的知識教養，伊十外歲開始創作，就此顯露筆花佮文采。珍．阿斯頓的作品，大部分是以家己佇英國庄跤出身、生活的中產階級日常做背景。19世紀英國社會的人情世態、風俗習慣、婚姻戀愛，攏是伊主要的創作題材。透過自然活跳、趣味詼諧的語言，靈活機巧的好禮雅氣、話帶心機，雕琢人物的個性佮精神，呈現英國文化佮社會的面貌佮底蒂。珍．阿斯頓有六部重要的長篇小說傳世，其中的《傲慢佮偏見》（Pride and Prejudice）是伊上蓋流行、上有影響力的作品。出版了後，毋但有濟濟讀者佮意愛讀，閣經過電影、電視劇的改編佮各種延伸改寫，對後世作品有誠重要的啟發，成做當代浪漫小說的原型經典。

本文的引用網址: